Elvin İsayev haqda rəsmi məlumat
Dekabrın 18-də Baş Prokurorluq bloqçu kimi tanınan Elvin İsayevlə bağlı məlumat yayıb. Qeyd olunur ki, Azərbaycan vətəndaşı olan Elvin İsayev Ukraynada miqrasiya qanunvericiliyinin tələblərini pozduğuna görə dekabrın 12-də deportasiya olunaraq Bakıya gətirilib. Onun Baş Prokurorluğun Ağır Cinayətlərə Dair İşlər üzrə İstintaq İdarəsində açılan iş, Nəsimi Rayon Məhkəməsinin 22 avqust 2019-cu il qərarı əsasında tutularaq Bakı İstintaq Təcridxanasına yerləşdirildiyi bildirilir.
Elvin İsayevə cinayət işi 15 avqust 2019-cu ildə dövlət əleyhinə yönələn açıq çağırışlar ittihamı ilə qaldırılıb.
Novator.az bildirir ki, dövlət əleyhinə yönələn açıq çağırışlara beş ilədək müddətə azadlıqdan məhrumetmə cəzası düşür. Eyni əməl təkrar və ya bir qrup şəxsin iştirakı ilə törədildikdə beş ildən səkkiz ilədək müddətə, xarici təşkilatların və onların nümayəndələrinin tapşırığı ilə törədildikdə yeddi ildən on iki ilədək müddətə azadlıqdan məhrumetmə ilə cəzalandırılır.
1980-ci ildə doğulan Elvin İsayev uzun illər Rusiyanın Sankt-Peterburq şəhərində yaşayıb, bir müddət həmin ölkənin vətəndaşı olub. 2019-cu ilin yayında Rusiya vətəndaşlığını itirən Elvin İsayevin Ukraynaya Avropaya getmək üçün yollandığı haqqında iddialar var.
Son vaxtlar Elvin İsayev sosial şəbəkələrdə yaydığı videolarda Azərbaycan hakimiyyətini sərt tənqid edirdi.
