Xarici ticarətin 11 ayı
2019-cu ilin 11 ayının xarici ticarət statistikası açıqlanıb. Novator.az bildirir ki, Dövlət Gömrük Komitəsinin rəsmi hesabatına görə, yanvar-noyabr aylarında Azərbaycanın xarici ticarət əməliyyatlarının həcmi 30,6 milyard dollar olub, 18,3 milyard dollarlıq ixrac, 12,3 milyard dollarlıq idxal qeydə alınıb.
11 ayda 190 ölkə ilə ticarət əməliyyatı aparıldığı, gömrük orqanlarının büdcəyə 4 milyard 6,3 milyon manat ödədiyi vurğulanır.
Statistikaya əsasən, yanvar-noyabr aylarında ixracın 5,9 faizi MDB ölkələrinin, 54,7 faizi Avropa İttifaqı ölkələrinin, 39,4 faizi digər ölkələrin payına düşüb.
İdxalda MDB-nin payı 24,9 faiz, Avropa İttifaqının payı 17,5 faiz, digər ölkələrin payı 57,6 faiz göstərilir.
11 ayda əsas tərəfdaş İtaliya olub. Bu ölkə ilə ticarət dövriyyənin 18,7 faizi həcmində rəsmiləşib.
İxracda əsas ölkə İtaliya (29,5 faiz), idxalda Rusiyadır (16,7 faiz).
Hesabata görə, ixracın 76,7 faizi xam neft və xam neft məhsulları, 2,2 faizi neft məhsulları, 11,3 faizi təbii qaz, 2,9 faizi meyvə-tərəvəz; idxalın 18,8 faizi maşın, mexanizm, elektrik aparatları, avadanlıqlar və onların hissələri, 12 faizi yeyinti məhsulları, 8,8 faizi nəqliyyat vasitələri və onların hissələri, 7,5 faizi qara metallar və onlardan hazırlanan məmulatlar, 2,9 faizi plastmas və ondan hazırlanan məmulatlar, 2,1 faizi əczaçılıq məhsulları, 2,1 faizi oduncaq və ondan hazırlanan məmulatlar, 2 faizi geyim əşyaları və geyim üçün ləvazimat kimi rəsmiləşib.
