Köçəryan həbs yerinə qaytarıldı
Ermənistanın sabiq prezidenti Robert Köçəryan dekabrın 17-də paytaxt Yerevandakı “İzmirlyan” Tibb Mərkəzindən “Kentron” cinayət-icra müəssisəsinə qaytarılıb. Novator.az bildirir ki, dekabrın 12-dən “İzmirlyan” Tibb Mərkəzində yatan sabiq prezidentin təkrarən əməliyyat olunduğu iddiaları təsdiqlənməyib. Xəstəxananın baş həkimi jurnalistlərə açıqlamasında sabiq prezidentin reabilitasiya mərhələsindən keçdiyini, özünü yaxşı hiss etdiyini açıqlayıb.
Robert Köçəryan bu il oktyabrın 9-da “İzmirlyan” Tibb Mərkəzində xoşxassəli şişdən əməliyyat olunub.
1954-cü ildə Azərbaycanın Dağlıq Qarabağ bölgəsində doğulan Robert Köçəryan Azərbaycana qarşı işğalçı müharibənin rəhbərlərindən biridir. 1992-ci ildən Dağlıq Qarabağdakı separatçı rejimə başçılıq edib, 1997-ci ildən Ermənistanda baş nazir, 1998-ci ildən prezident postlarını tutub.
2008-ci il fevralın 19-da keçirilmiş prezident seçkisində hakimiyyət Dağlıq Qarabağ bölgəsində doğulmuş, işğalçı müharibənin qaniçən liderlərindən olan Serj Sərkisyana ötürülüb. Müxaliflər paytaxt Yerevanda seçkinin rəsmi nəticələrinə davamlı etiraz aksiyaları keçiriblər. Martın 1-də aksiyalar hərbi güclə dağıdılıb, 8 mülki şəxs, 2 polis əməkdaşı həlak olub.
2018-ci ildə qarabağlıların hakimiyyəti çökəndən sonra bu iş üzrə istintaq yenilənib. Xüsusi İstintaq Xidməti Robert Köçəryanı 1 mart 2008-ci il qırğınının istintaqına cəlb edib, ötən il iyulun 26-da ona cinayət işi qaldırıb. Sabiq prezident dövlətin konstitusiya quruluşunu zorla dəyişdirmədə ittiham edilir. O, xüsusilə külli miqdarda rüşvət almaqda da günahlandırılır.
2018-ci il iyulun 27-də Robert Köçəryan 2 ay müddətinə həbs edilib, avqustun 13-də azadlığa buraxılıb. Dekabrın 7-də Robert Köçəryan yenə tutulub, 2019-cu il mayın 18-də pul girovu ilə azadlığa çıxıb. İyunun 25-dən Robert Köçəryan yenidən həbsdədir.
