Görüşlər
Azərbaycana rəsmi səfərə gələn Ukrayna prezidenti Vladimir Zelenski dekabrın 17-si Bakıda rəsmən qarşılanıb. Azərbaycanın dövlət və hökumət nümayəndələri ona, Ukrayna nümayəndə heyətinin üzvləri prezident İlham Əliyevə təqdim olunub.
Ardınca İlham Əliyev və Vladimir Zelenski əvvəl təkbətək, sonra nümayəndə heyətlərinin iştirakı ilə geniş tərkibdə görüşüblər.
AZƏRTAC xəbər verir ki, həmçinin Azərbaycan-Ukrayna sənədləri imzalanıb və İlham Əliyevlə Vladimir Zelenski mətbuata bəyanatlarla çıxış ediblər.
Sənədlər bunlardır: Gəncə şəhəri və Odessa şəhəri arasında niyyət protokolu; Quba şəhəri ilə Truskavets şəhəri arasında ticarət-iqtisadi, elmi-texniki və mədəni əməkdaşlıq haqqında müqavilə; Azərbaycan Respublikasının İqtisadiyyat Nazirliyi ilə Ukraynanın Dövlət Tənzimləmə Xidməti arasında biznesin aparılması şəraitinin tənzimlənməsi sahəsində əməkdaşlıq haqqında saziş; Azərbaycan Respublikasının Xüsusi Dövlət Mühafizə Xidməti ilə Ukraynanın Dövlət Xüsusi Rabitə və Məlumatın Mühafizəsi Xidməti Administrasiyası arasında Bakı-Kiyev dövlətlərarası hökumət rabitə xəttinin təşkil edilməsi haqqında saziş.
Həmin gün baş nazir Əli Əsədov Vladimir Zelenski ilə birgə işçi nahar edib. Söhbət zamanı Azərbaycanla Ukrayna arasında münasibətlərin, o cümlədən iqtisadi sahədə əməkdaşlığın perspektivləri barədə fikir mübadiləsi aparılıb.
