Ekspert büdcə qanunvericiliyini dəyişməyə çağırır
İqtisadçı Rövşən Ağayev büdcə qanunvericiliyini təkmilləşdirməyə çağırır. Novator.az-ın məlumatına görə, ekspert özünün “Facebook” səhifəsində yazır ki, 2020-ci il fevralın 9-da keçiriləcək növbədənkənar seçkidən sonra yeni parlamentin görməli olduğu ilk işlərdən biri büdcə qanunvericiliyinin təkmilləşdirilməsi olmalıdır: “Prezident fərmanı ilə 2021-ci ildən nəticə əsaslı büdcəyə keçilir. Hazırkı büdcə qanunvericiliyi yeni sistemə keçid üçün təkmil deyil.
Büdcə qanunvericiliyində islahatların əsas istiqamətlərindən biri kimi parlamentin büdcə səlahiyyətlərinin artırılmasını, prezident başda olmaqla icra hakimiyyətinin büdcə səlahiyyətlərinin məhdudlaşdırılmasını görürəm. İcra hakimiyyəti parlamentin təsdiqlədiyi büdcə göstəricilərini dəyişdirə bilməməlidir, istənilən dəyişiklik parlamentin müzakirəsi ilə baş verməlidir.
Büdcənin və prezidentin ehtiyat fondlarının xərclərdə payı 2 faizdən çox olmamalıdır. Hazırda bu göstərici 7 faizdir. Fövqəladə vəziyyətlər üçün əlavə maliyyəyə ehtiyac olarsa, parlament dərhal yığışıb büdcəni dəyişməklə icra hakimiyyəti üçün vəsait ayırmalıdır.
Büdcənin parlament müzakirələrinin vaxtı azı 15 gün artırılmalı, büdcə qanunu Milli Məclisə oktyabrın 1-dən gec olmayaraq təqdim edilməli, müzakirələrlə bağlı ayrıca prosedur müəyyən edilməlidir.
Büdcə təsnifatı təkmilləşdirilməlidir. Şəffaflıq prinsiplərini pozan xərc bölmələri ləğv edilməlidir. Bura ilk növbədə “əsas bölmələrə aid edilməyən xərclər” kimi qeyri-müəyyən istiqamət daxildir. Bu cür təsnifat nəticə əsaslı büdcə sisteminə keçid mexanizmi ilə ziddiyyət təşkil edir.
Nəhayət, büdcənin ən böyük xərc maddəsi olan investisiya xərclərinin bölgüsündə səlahiyyət parlamentə keçməlidir”.
