Azərbaycan şikayət liderləri arasında
Hüquqşünas Xalid Ağalıyev Azərbaycanın Avropa İnsan Hüquqları Məhkəməsində baxış növbəsi gözləyən şikayətlər sarıdan liderlər qrupunda olduğunu yazır. Novator.az-ın məlumatına görə, hüquqşünas özünün “Facebook” səhifəsində qeyd edir ki, 2019-cu il oktyabrın sonuna Avropa Məhkəməsində baxılmasını gözləyən şikayətlərin sayı 60150 olub: “Bu şikayətlərin 75 faizə qədəri 5 ölkənin payına düşür. Rusiyadan göndərilmiş 14 min 600 şikayət növbə gözləyir, bu da şikayətlərin ümumilikdə 24 faizindən çoxdur. Sonrakı pillədə 8700 şikayətlə (ümumi şikayətlərin 14 faizindən çox) Türkiyə dayanır.
Şikayətlərin 14 faizi (8650 şikayət) Ukraynadan, 13 faizi (7950 şikayət) Rumıniyadan, 5 faizi (3200 şikayət) İtaliyadan gəlib.
Azərbaycan 6-cı sırada dayanır – 2 min 200 şikayət. Bu, şikayət yükünün 3,7 faizi deməkdir. Ölkəni 2,9 faizlə Ermənistan izləyir”.
