Yurçeviç istefaya göndərildi
Azərbaycan Futbol Federasiyaları Assosiasiyası milli komandanın xorvatiyalı baş məşqçisi Nikola Yurçeviçi istefaya göndərib. Novator.az-ın məlumatına görə, qərar İcraiyyə Komitəsinin 13 dekabr iclasında qəbul olunub.
Nikola Yurçeviç milli komandaya bu il fevralın 11-dən baş məşqçilik edib. Onun rəhbərliyi altında yığma yalnız bir oyunda qələbə qazanıb (Bəhreynlə yoldaşlıq oyununda 3:2).
Milli komanda 2020-ci ilin Avropa çempionatının seçmə mərhələsində uğursuz çıxış edib. E qrupunda yarışan yığma 8 oyunda 1 xal toplayaraq 5 komandalıq qrupda sonuncu olub. Bu, milli komandanın tarixində ən pis göstəricinin təkrarıdır. Yığma beynəlxalq turnirlərə 1996-cı ilin Avropa çempionatının seçmə mərhələsindən qatılmış, həmin turnirdə 1 xal yığaraq 6 komandalıq qrupda 6-cı yeri tutmuşdu.
Azərbaycan milli komandasına 1992-1993-cü illərdə Ələkbər Məmmədov, 1994-1995-ci illərdə Ağasəlim Mircavadov, 1995-1996-cı illərdə Kazbek Tuayev, 1997-1999-cu illərdə Vaqif Sadıqov baş məşqçilik edib.
1999-2000-ci illərdə milli komandanın sükanı arxasında Əhməd Ələsgərov, 2000-2001-ci illərdə İqor Ponomaryov, 2002-2004-cü illərdə Əsgər Abdullayev, 2004-2005-ci illərdə Karlos Alberto Torres, 2005-2007-ci illərdə Şahin Diniyev, 2008-2014-cü illərdə Berti Foqts, 2014-2017-ci illərdə Robert Prosineçki, 2017-2018-ci illərdə Qurban Qurbanov dayanıb.
Nikola Yurçeviç 1966-cı ildə Xorvatiyanın paytaxtı Zaqrebdə doğulub. Yerli “Dinamo” və “Zaqreb”, Belçikanın “Antverpen”, Avstriyanın “Zalsburq”, Almaniyanın “Frayburq” klublarında və Xorvatiya milli komandasında yarımmüdafiəçi mövqeyində çıxış edib.
“Zaqreb”, “Dinamo”, “Zalsburq”, “Slaven” (Xorvatiya) klublarında baş məşqçi, “Lokomotiv” (Moskva, Rusiya), “Beşiktaş” (Türkiyə), “Vest Hem” (İngiltərə) klublarında və Xorvatiya yığmasında baş məşqçinin köməkçisi olub.
