Gələcək Partiyası elan olundu
Türkiyənin sabiq baş naziri Əhməd Davudoğlu dekabrın 13-də yaratdığı siyasi təşkilatın adını açıqlayıb – Gələcək Partiyası.
Novator.az bildirir ki, Əhməd Davudoğlu 1959-cu ildə Konyada doğulub. İstanbuldakı Bosfor Universitetini bitirib. İqtisadçı, politoloq və beynəlxalq münasibətlər mütəxəssisidir.
Hakim Ədalət və İnkişaf Partiyasının qurucularından olan Əhməd Davudoğlu 2009-cu ildən xarici işlər naziri, 2014-cü ilin avqust ayından 2016-cı ilin may ayına kimi baş nazir postunu tutub.
Ədalət və İnkişaf Partiyası 2001-ci il avqustun 14-də yaradılıb, 2002-ci ildən hakimiyyətdədir. Partiyanın lideri Rəcəb Teyyub Ərdoğan 2003-cü ildən 2014-cü ilədək baş nazir olub, 28 avqust 2014-cü ildən prezidentdir.
2018-ci ilin iyul ayında Türkiyədə idarə üsulu dəyişib, baş nazir postu ləğv edilib, prezident hökumət başçısı olub.
Bu il sentyabrın 13-də Əhməd Davudoğlu Ədalət və İnkişaf Partiyasından istefa verib. O, qərarını partiyanın bütün təməl hədəflərdən, demokratiya yolundan kənarlaşması ilə əsaslandırıb.
