19 ölkə, 48 komanda
2019-2020-ci illər mövsümündə UEFA-nın klub turnirlərinə 237 komanda buraxılıb. Novator.az bildirir ki, Çempionlar Liqası və Avropa Liqasının qrup mərhələləri bitəndən sonra mübarizəni 55 UEFA üzvündən 19-nun təmsilçiləri davam etdirir: Çempionlar Liqasında 16, Avropa Liqasında 32 klub oynayır.
İspaniya və İngiltərənin klub turnirlərində 7, Almaniyanın 6, İtaliyanın 5, Portuqaliyanın 4 komandası var.
Fransa, Belçika, Hollandiya, Avstriya və Şotlandiya 2, Ukrayna, Türkiyə, Danimarka, Kipr, Yunanıstan, İsveçrə, İsveç, Bolqarıstan və Rumıniya 1 komanda ilə yarışırlar.
Klub reytinqinə 97,712 əmsalla İspaniya başçılıq edir.
Azərbaycan 18,750 əmsalla 26-cı yerdədir. Ölkə bu mövsüm 3,375 əmsal qazanıb.
Klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır. Qrup raunduna qədər qələbə 1, heç-heçə 0,5 xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
