Rusiyaya ağır idman cəzaları
Dünya Antidopinq Agentliyinin İcraiyyə Komitəsi dekabrın 9-da Rusiyanı cəzalandırıb. Novator.az bildirir ki, qərara əsasən, Rusiya dörd il ərzində beynəlxalq idman yarışlarına ev sahibliyi etmək, ölkənin yığma komandaları isə turnirlərdə dövlət bayrağı altında çıxış etmək hüququnu itirir. Həmin müddətdə yalnız dopinqdən istifadə etməmiş və neytral statuslu rusiyalı idmançılar beynəlxalq yarışlara buraxılacaq.
Rusiya Milli Olimpiya Komitəsinin yüksək rəsmilərinin böyük turnirlərə qatılması da dörd il müddətinə yasaqlanır.
Dünya Antidopinq Agentliyi 2015-ci ildən bəri Rusiyanı müxtəlif pozuntularda günahlandırır. Bununla bağlı müxtəlif hesabatlar yayılıb və cəzalar tətbiq edilib.
2014-cü ildə Soçidə keçirilmiş Qış Olimpiya Oyunlarında ən çox qızıl medal almış Rusiyanın bəzi idmançılarının dövlət səviyyəsində təşkil olunmuş şəkildə dopinqdən istifadəsi üzə çıxıb, ölkə bir çox medaldan məhrum edilib, komanda hesabında ilk yerdən məhrum olub. Bu qalmaqala görə Beynəlxalq Olimpiya Komitəsinin İcraiyyə Komitəsi Rusiyanı 2018-ci ilin fevralında Cənubi Koreyanın Pxençan şəhərində keçirilən Qış Olimpiya Oyunlarından kənarlaşdırıb, rusiyalı idmançılar yarışlara olimpiya bayrağı altında qatılıb.
