Ermənistanda yol hərəkəti qanunu necə dəyişir?
Ermənistan parlamenti dekabrın 9-da yol hərəkəti qanunvericiliyini sərtləşdirən layihəyə səs verib.
Novator.az xəbər verir ki, yenilik bal sistemi üzrə cəza mexanizmini nəzərdə tutur.
Kiçik pozuntulara görə 1 bal, 5 min dramadək cərimə tətbiqi gözlənir (478 dram 1 dollara bərabərdir).
Maşını sərxoş vəziyyətdə idarə edənlər və ya sürət həddini 50 kilometr/saatdan çox aşanlar üçün 4 cərimə balı rəsmiləşir.
İl ərzində 9 cərimə balı toplayan şəxs 6 ay müddətinə sürücülük hüququndan məhrum edilir. Sürücülük hüququ bərpa olunanda sürücü yenə 9 ballıq limit əldə edir. Həmin limiti də keçən sürücü 1 il ərzində avtomobil idarə etmək hüququnu itirir. Bu halda sürücülük hüququnun bərpası yalnız imtahan verdikdən sonra mümkün olur.
Sürücülük vəsiqəsi olmadan avtomobilin idarə olunmasına görə məsuliyyət də sərtləşir. Bu halda 200-300 min dram həcmində cərimənin və ya bir il fəaliyyət hüququndan məhrum edilməklə 3 ay həbs cəzasının tətbiqi nəzərdə tutulur.
Nəqliyyat vasitəsini sərxoş vəziyyətdə idarə edənlərə 300-500 min dram cərimə və ya bir il işləmək hüququndan məhrum edilməklə 6 ay müddətinə azadlıqdan məhrumetmə cəzası kəsilə bilər.
Qanunvericilikdəki yeniliklərin bir hissəsi 2020-ci ilin yanvar, digər hissəsi isə sentyabr ayından qüvvəyə minir.
Səidə Hüseynova
