21 ay oldu…
Mərkəzi Bank dekabrın 6-da ABŞ dollarının məzənnəsini 1,7 manat səviyyəsində saxlayıb. Novator.az bildirir ki, bu rəsmi kurs dekabrın 9-dək qüvvədə olduğu üçün qiymət sabitliyinin 21 ayı tamamlanır.
2015-ci ildə Azərbaycan valyutasının devalvasiyalara uğraması nəticəsində dolların rəsmi kursu 0,7844 manatdan 1,5594 manata qalxıb.
2016-cı ildə rəsmi qiymət 1,7707 manata çatıb.
2017-ci ilin fevralında maksimal qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən 1,7 manata satılır.
Avro 2019-cu ilə 1,9323 manatla başlayıb.
25-29 aprel arası, mayın 3-də, 20-24 və 29-31 may, 24 iyul-5 avqust arası avro 1 manat 90 qəpikdən ucuz satılıb. Avqustun 14-dən rəsmi məzənnə yenə 1 manat 90 qəpikdən aşağıdır.
Gürcüstan larisi bu il 0,6346, Rusiya rublu 0,0245, Türkiyə lirəsi 0,3141 manatla start götürüb.
Dövlət Neft Fondu manatın qorunması üçün Mərkəzi Bankın yanvar-noyabr aylarında keçirdiyi valyuta hərraclarında 5 milyard 707,4 milyon ABŞ dolları məbləğində vəsait satıb.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar göstərilib.
Mərkəzi Bankın hesabatına görə, dekabrın 1-nə valyuta ehtiyatının həcmi 6 milyard 183,1 milyon dollara çatıb. Bu, 2019-cu ilin əvvəli ilə müqayisədə 557,4 milyon dollar çoxdur. Yanvarın 1-nə 5 milyard 625,7 milyon dollarlıq valyuta ehtiyatı vardı.
