Sərkisyanın ölkədən çıxması yasaqlanıb
Ermənistanın Xüsusi İstintaq Xidməti ölkənin sabiq rəhbəri Serj Sərkisyanı cinayət məsuliyyətinə cəlb edib. O, xüsusilə külli miqdarda dövlət vəsaitinin mənimsənməsində iştirakda ittiham edilir. Novator.az bildirir ki, ittihama görə, Serj Sərkisyan 2013-cü ildə prezident vəzifəsini tutarkən bir qrup şəxsin 489 milyon 160 min 310 dram (1 milyon 23,7 min dollar) dövlət vəsaitini ələ keçirməsini təşkil edib. Söhbət kənd təsərrüfatı işləri üçün dizel yanacağının şişirdilmiş qiymətə alınmasından gedir.
Xüsusi İstintaq Xidməti Serj Sərkisyanın ölkədən çıxmasını yasaqlayıb.
Serj Sərkisyan 1954-cü ildə Azərbaycanın Dağlıq Qarabağ bölgəsinin mərkəzi şəhəri Stepanakertdə (Xankəndi) doğulub. Yerevan Dövlət Universitetinin filologiya fakültəsini bitirib.
Stepanakert Şəhər Komsomol Komitəsində şöbə müdiri, ikinci katib, birinci katib, Stepanakert Şəhər Partiya Komitəsində şöbə müdiri, Dağlıq Qarabağ Muxtar Vilayəti Partiya Komitəsində təlimatçı, birinci katibin köməkçisi postlarını tutub.
O, Azərbaycana qarşı işğalçı müharibənin qaniçən liderlərindən biridir. 1989-cu ildən Dağlıq Qarabağ separatçılarının komandanı, 1993-cü ildən Ermənistanın müdafiə naziri olub.
1995-2008-ci illərdə Serj Sərkisyan Dövlət Təhlükəsizliyi İdarəsinin rəisi (sonradan milli təhlükəsizlik naziri), daxili işlər və milli təhlükəsizlik naziri (sonradan yenə milli təhlükəsizlik naziri), Prezident Aparatının rəhbəri, Milli Təhlükəsizlik Şurasının katibi (eyni zamanda müdafiə naziri), baş nazir kürsülərini tutub.
2008 və 2013-cü illərdə prezident seçilib.
2007-ci ildən Ermənistan Respublika Partiyasının sədridir.
Serj Sərkisyan 2018-ci il aprelin 9-dək prezident postunu tutub, aprelin 17-si parlamentdə baş nazir seçilib və prezident sərəncamı ilə bu posta təsdiqlənib, ancaq aprelin 23-də xalq etirazlarına görə istefa verməyə məcbur olub.
