Cəza qərarı dəyişməyəcək?
Vəkillik fəaliyyəti dayandırılan Şəhla Hümbətova dekabrın 5-də Novator.az-a danışıb. O deyib ki, Vəkillər Kollegiyası Rəyasət Heyətinin cəza qərarını hələ də əldə edə bilməyib: “Yalnız şifahi bildiriblər ki, bir vətəndaşın şikayəti əsasında vəkillik fəaliyyətində nöqsanların üzə çıxıb, həm də kollegiyaya üzvlük haqqının ödənməsi gecikdirilib.
Diqqətsizlikdən üzvlük haqqının ödənməsində yubanmalar olub, amma kollegiyadan heç kim mənimlə əlaqə saxlayıb xəbərdarlıq etməyib, sanki cəza vermək üçün fürsət gözləyiblər.
Vəkillik fəaliyyətimdə iddia olunan nöqsanlar da mənsiz müzakirə edilib, yalnız sonradan bundan xəbər tutmuşam.
Vəkillik fəaliyyətim noyabrın 27-də Vəkillər Kollegiyası Rəyasət Heyətinin qərarı ilə dayandırılıb, vəkilliyimə xitam verilməsi üçün inzibati-iqtisadi məhkəməyə müraciət olunacaq. Ancaq bu günə qədər hər hansı rəsmi qərar ala bilməmişəm. Dekabrın 4-də Rəyasət Heyətinin sədri Anar Bağırovla görüşdüm. Hər hansı izahatımı qəbul etməyəcəyini, 27 noyabr qərarının dəyişməyəcəyini bildirdi. Dedi yalnız əlindəki yarımçıq işləri bitirmək imkanın var”.
Şəhla Hümbətova siyasi məhbusların əsas vəkillərindən biri kimi tanınır.
