Avropa Məhkəməsi Azərbaycanı iki yazara görə cərimələdi
Dekabrın 5-də Avropa İnsan Hüquqları Məhkəməsi mərhum yazıçı-publisist Rafiq Tağının və jurnalist Samir Sədaqətoğlunun işi ilə bağlı qərarını açıqlayıb.
Rafiq Tağı 2006-cı ilin noyabrında Bakıda nəşr olunan “Sənət qəzeti”ndə çap etdirdiyi “Avropa və biz” məqaləsinə görə tutulub, 3 il müddətinə azadlıqdan məhrum olunub. “Sənət qəzeti”nin redaktoru Samir Sədaqətoğlu isə 4 il azadlıqdan məhrumetmə cəzası alıb. 2007-ci il dekabrın 28-də prezident İlham Əliyev hər iki şəxsi əfv edib.
2011-ci il noyabrın 19-da Rafiq Tağı Bakıda bıçaqlanıb, 4 gün sonra müalicə aldığı xəstəxanada vəfat edib.
İndiyədək bu cinayətə görə məsuliyyətə cəlb edilən olmayıb.
Avropa Məhkəməsinin dekabrın 5-də açıqladığı qərar “Avropa və biz” yazısına görə məhkumluqlarla bağlıdır. Rafiq Tağı və Samir Sədaqətoğlunun məhkum edilməsi Avropa İnsan Hüquqları Konvensiyası ilə verilmiş fikri ifadə etmək azadlığı hüququnun pozulması kimi dəyərləndirilib, Azərbaycan dövlətinin boynuna Rafiq Tağının həyat yoldaşına və Samir Sədaqətoğluna ayrı-ayrılıqda 12 min 850 avro təzminat ödəmək öhdəliyi qoyulub.
