2020-2021 mövsümünün ilkin reqlamenti
UEFA-nın klub turnirlərinin 2020-2021 mövsümü üzrə ilkin reqlamenti bəlli olub. Novator.az-ın məlumatına görə, Çempionlar Liqasında qrup mərhələsinə qədər beş ələmə raundu nəzərdə tutulur.
İlkin mərhələdə Şimali İrlandiya, Kosovo, Andorra, San Marino çempionları yer alır.
Kipr, Serbiya, Şotlandiya, Belarus, İsveç, Norveç, Qazaxıstan, Polşa, Azərbaycan, İsrail, Bolqarıstan, Rumıniya, Slovakiya, Sloveniya, Macarıstan, Şimali Makedoniya, Moldova, Albaniya, İrlandiya, Finlandiya, İslandiya, Bosniya, Litva, Latviya, Lüksemburq, Ermənistan, Malta, Estoniya, Gürcüstan, Uels, Monteneqro, Farer adaları, Cəbəllütariq çempionları turnirə birinci mərhələdən qoşulur.
Xorvatiya, Danimarka, İsveçrə çempionları, Türkiyə, Hollandiya, Avstriya, Çexiya, Yunanıstan, Xorvatiya çempionatlarının gümüş mükafatçıları rəqiblərini ikinci mərhələdə gözləyir.
Üçüncü mərhələdə Çexiya, Yunanıstan çempionları, Fransa, Rusiya çempionatlarının bürünc mükafatçıları, Portuqaliya, Belçika, Ukrayna çempionatlarının gümüş mükafatçıları var.
Hollandiya, Avstriya çempionları yarışa dördüncü mərhələdən başlayır.
İspaniya, İngiltərə, İtaliya, Almaniya çempionatlarını ilk dörd pillədə, Fransa, Rusiya çempionatlarını ilk iki pillədə bitirən komandalar, Portuqaliya, Belçika, Ukrayna, Türkiyə çempionları birbaşa qrupa vəsiqə alırlar.
Avropa Liqasında da beş (Çempionlar Liqasından ələnən komandalar üçün üç) ələmə raundu var. Azərbaycan kubokunun sahibi, eləcə də milli çempionatın gümüş və bürünc mükafatçıları turnirə ilkin raunddan sonra – birinci mərhələdən start verir.
