Nazir cəbhə xəttinə baş çəkib
Müdafiə Nazirliyinin rəhbər heyəti cəbhə zonasında yerləşən hərbi hissələrdə və döyüş mövqelərində olub. Dekabrın 4-də yayılan rəsmi məlumata görə, döyüş postlarında növbə çəkən şəxsi heyətlə görüşən müdafiə naziri general-polkovnik Zakir Həsənov müdafiənin dayanıqlığını, qışa hazırlığının vəziyyətini, hərbi qulluqçuların döyüş və mənəvi-psixoloji hazırlığını yoxlayıb, komanda-müşahidə məntəqəsindən düşmən mövqelərini izləyib.
Əməliyyat şəraitinin vəziyyəti barədə məruzələri dinlədikdən sonra müdafiə naziri bölmələrin daim döyüşə hazır vəziyyətdə olmasını təmin etmək məqsədilə müvafiq tapşırıqlar verib.
Müdafiə naziri cəbhə zonasına yaxın ərazidə yeni istifadəyə verilmiş mühəndis şəhərciyinə də baş çəkib.
