6-cı “Qızıl top”
Media əhli arasında sorğu keçirən “France Football” jurnalı (Fransa) 2018-2019 mövsümünün ən yaxşı futbolçusunu müəyyənləşdirib. Novator.az bildirir ki, dekabrın 2-si Parisdə keçirilmiş mərasimdə “Qızıl top” mükafatı argentinalı hücumçu Lionel Messiyə təqdim olunub. Bu, Lionel Messinin 6-cı “Qızıl top”udur.
Lionel Messi 1987-ci il iyunun 24-də Argentinanın Rosario şəhərində doğulub. 2004-cü ildən İspaniyanın “Barselona” klubunda, 2005-ci ildən Argentina milli komandasında çıxış edir.
10 dəfə İspaniya çempionu, 4 dəfə UEFA Çempionlar Liqasının qalibi olub, 3 dəfə UEFA superkubokunu əldə edib, 3 dəfə klublar arasında dünya çempionluğunu qazanıb.
Olimpiya çempionu (2008), dünya çempionatının gümüş mükafatçısıdır (2014).
2018-2019 mövsümündə Lionel Messi İspaniya çempionatında qızıl medala sahib çıxıb, bu turnirdə, həmçinin Çempionlar Liqasında hamıdan çox qol vurub, Amerika kubokunda üçüncülük əldə edib.
Lionel Messi 2009-cu ildə həm “France Football” jurnalının “Qızıl top” mükafatını alıb, həm də FİFA onu dünyanın ən yaxşı futbolçusu seçib. 2010-2015-ci illərdə bu iki mükafat birgə verilib və argentinalı 2010, 2011, 2012, 2015-ci illərdə “FİFA Qızıl top”a sahib çıxıb.
Lionel Messi FİFA-nın sorğusunda da 2018-2019 mövsümünün ən yaxşı futbolçusu seçilib.
“France Football” jurnalı “Qızıl top” mükafatını 1956-cı ildə təsis edib.
