Yeni ombudsman Konstitusiya Məhkəməsindən gəldi
Noyabrın 29-da Milli Məclis prezident İlham Əliyevin təqdimatına baxaraq Səbinə Əliyevanı insan hüquqları üzrə müvəkkil (ombudsman) seçib.
Səbinə Əliyeva indiyə qədər Konstitusiya Məhkəməsi Aparatı rəhbərinin müavini idi.
Novator.az bildirir ki, 1980-ci il təvəllüdlü Səbinə Əliyeva hüquq üzrə fəlsəfə doktorudur. Parlament sədrinin sabiq müavini Yaşar Əliyevin qızı, Milli Məclisin ictimai birliklər və dini qurumlar komitəsinin sədri Siyavuş Novruzovun həyat yoldaşıdır.
Ombudsman vəzifəsinə daha iki namizəd vardı: Bakı Apellyasiya Məhkəməsi sədrinin müavini Kəmalə Abiyeva, Ali Məhkəmənin insan hüquqları və ictimaiyyətlə əlaqələr şöbəsinin müdiri Kəmalə Əliyeva.
2002-ci ildən ombudsman vəzifəsini 1937-ci il təvəllüdlü Elmira Süleymanova tuturdu.
Qanuna görə, ombudsmanı prezidentin təqdimatı ilə Milli Məclis seçir. Onun səlahiyyət müddəti 7 ildir. Eyni şəxs müvəkkil vəzifəsinə iki dəfədən artıq seçilə bilməz.
İnsan hüquqları üzrə müvəkkilin səlahiyyət müddəti bitdiyi gün yeni müvəkkil seçilmədikdə o, səlahiyyətlərinin icrasını davam etdirir.
