UEFA-nın klub reytinqi
UEFA Çempionlar Liqası və Avropa Liqasının qrup mərhələlərində beş tur arxada qalıb.
Novator.az bildirir ki, son tur ərəfəsində klub reytinqinə 94,855 əmsalla İspaniya başçılıq edir.
Turnirlərdə klubları qalan Rusiya 7-ci, Ukrayna 10-cu, Türkiyə 11-ci, Qazaxıstan 24-cü, Azərbaycan 26-cı yerdədir.
Klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır. Qrup raunduna qədər qələbə 1, heç-heçə 0,5 xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Mövsümün əmsallar cədvəlində İngiltərə öndədir: 11,571 əmsal.
Azərbaycan bu mövsüm 3,125 əmsal qazanıb.
2019-2020-ci illər mövsümündə klub turnirlərinə 237 komanda buraxılıb. Mübarizəni qrup raundlarında 55 UEFA üzvündən 29-nun təmsilçiləri davam etdirir: Çempionlar Liqasında 32, Avropa Liqasında 48 klub oynayır.
Azərbaycan UEFA-nın klub turnirlərinə 4 komanda ilə qatılıb. Qrup raundunadək “Qarabağ” gəlib çıxa bilib. Avropa Liqasının A qrupunda yer alan Azərbaycan təmsilçisi növbəti raunda çıxmaq şansını itirib.
