“Qarabağ”sız…
UEFA Avropa Liqasında qrup mərhələsinin beşinci turu Azərbaycan təmsilçisi “Qarabağ” üçün uğursuz olub. Novator.az-ın məlumatına görə, A qrupunda yarışan ağdamlılar noyabrın 28-i İspaniyada “Sevilya” komandasına 0:2 hesabı ilə uduzublar. Eyni hesabla Lüksemburqda “Düdelanj”ı yenən Kiprin APOEL komandası “Qarabağ” üçün əlçatmaz olaraq “Sevilya”nın ardınca 1/16 finala yüksəlib.
İndiyədək digər qruplardan “Bazel” (İsveçrə), “Sportinq” (Portuqaliya), LASK (Avstriya), “Seltik” (Şotlandiya), “Espanyol” (İspaniya), “Gent” (Belçika), “Volfsburq” (Almaniya), “Braqa” (Portuqaliya), “Vulverhempton” (İngiltərə), “Mançester Yunayted” (İngiltərə), “Alkmaar” (Hollandiya) növbəti mərhələyə vəsiqə əldə ediblər.
“Qarabağ” komandasının əsası 1951-ci ildə qoyulub. 1977-ci ilədək komanda “Məhsul”, 1982-ci ilədək “Şəfəq”, 1988-ci ilədək “Kooperator” adı daşıyıb. 1 dəfə Azərbaycan SSR-in, 7 dəfə müstəqil Azərbaycanın çempionu olub.
Komanda 2014-2015, 2015-2016, 2016-2017, 2018-2019 mövsümlərində Avropa Liqasının qrup mərhələsində, 2017-2018 mövsümündə Çempionlar Liqasının qrup mərhələsində oynayıb.
1993-cü ildə Ağdam şəhəri işğal olunduqdan sonra komanda köçkün klub kimi fəaliyyət göstərir, hazırda Bakıda məskunlaşıb.
