Palata fərmanı geri oxundu
Prezident İlham Əliyev maliyyə xidmətləri bazarında tənzimləmə və nəzarət sisteminin idarə edilməsinin təkmilləşdirilməsinə sərəncam verib. Novator.az-ın məlumatına görə, noyabrın 28-də imzalanan sərəncamla Maliyyə Bazarlarına Nəzarət Palatası ləğv edilir və səlahiyyətləri, o cümlədən onun maliyyə xidmətləri bazarında lisenziyalaşdırma, tənzimləmə və nəzarət, investorların və maliyyə xidmətləri istehlakçılarının hüquqlarının qorunması sahəsində vəzifə və hüquqları, habelə əmlakı Mərkəzi Banka verilir.
Mərkəzi Bank bir ay müddətində uyğun qanunvericilik aktlarını hazırlayıb prezidentə təqdim etməli, müvafiq təhvil-təslim işlərini həyata keçirməlidir.
Maliyyə Bazarlarına Nəzarət Palatası prezidentin 3 fevral 2016-cı il fərmanı ilə Qiymətli Kağızlar üzrə Dövlət Komitəsinin bazasında qurulub, ona Maliyyə Nazirliyinin Dövlət Sığorta Nəzarəti Xidməti və Mərkəzi Bank yanında Maliyyə Monitorinqi Xidməti də qoşulub.
2018-ci il oktyabrın 4-də Maliyyə Bazarlarına Nəzarət Palatasının yeni nizamnaməsi təsdiqlənib. Nizamnaməyə əsasən, Maliyyə Bazarlarına Nəzarət Palatası qiymətli kağızlar bazarı, investisiya fondları, sığorta, kredit təşkilatları (bank, bank olmayan kredit təşkilatları və poçt rabitəsinin operatoru), valyuta mübadiləsi fəaliyyəti və ödəniş sistemləri (maliyyə bazarları) sahəsində fəaliyyətin lisenziyalaşdırılmasını, tənzimlənməsini və həmin sahələrə nəzarət sisteminin şəffaflığını və çevikliyini təmin edir.
Palatanın idarəetmə orqanı İdarə Heyətidir. İdarə Heyətinin sədri səlahiyyətlərini İbrahim Alışov icra edirdi.
