ADR Hərəkatından boykot anonsu
Prezident İlham Əliyevin sədrlik etdiyi Yeni Azərbaycan Partiyası parlamentin buraxılması, növbədənkənar seçki təyin olunması təşəbbüsü ilə çıxış edib.
Azərbaycanda növbəti parlament seçkisi 2020-ci il noyabrın 1-də olmalıdır. Konstitusiyaya görə, prezident Milli Məclisi buraxa bilər. Bu halda 60 gün ərzində növbədənkənar parlament seçkisi keçirilməlidir.
Qubad İbadoğlunun rəhbərlik etdiyi Azərbaycan Demokratiya və Rifah (ADR) Hərəkatı bununla bağlı açıqlama yayıb. Novator.az-ın məlumatına görə, ADR Hərəkatı bəyan edir ki, Seçki Məcəlləsində Avropa Şurasının Venesiya Komissiyasının təklifləri əsasında təkmilləşdirmə həyata keçirilmədən, seçki komissiyaları paritet əsaslarla yenidən formalaşdırılmadan, seçki prosesində inzibati resurslardan istifadəyə son qoyulmadan, siyasi məhbuslar azadlığa buraxılmadan parlament seçkisi şousunda iştirak etməyəcək və təyinatlar əsasında formalaşacaq parlamentin legitimləşdirilməsinə dəstək olmayacaq.
Qeyd olunur ki, ADR Hərəkatı siyasi və ictimai qüvvələrin birgə mövqeyinin formalaşdırılması üçün hazırkı durumun müzakirəsinin təşkilini sayır.
ADR Hərəkatı 2015-ci ildə yaradılıb.
