Seçki təşviqatına qoşulan media qurumları
Noyabrın 30-da 23 dekabr bələdiyyə seçkilərinin təşviqat mərhələsi başlayır. Novator.az bildirir ki, ödənişli seçkiqabağı təşviqata qoşulmaq üçün Mərkəzi Seçki Komissiyasına 5 televiziya bildiriş verib: “Xəzər”, ARB, “Azad Azərbaycan”, “Real”, “Lider”.
“Trend”, “Səs”, APA, “Olaylar” agentlikləri, “İki sahil”, “Səs”, “Kaspi”, “Həftə içi” və “Olaylar” qəzetləri də ödənişli seçkiqabağı təşviqatda iştirak etmək niyyətlərini rəsmiləşdiriblər.
118 seçki dairəsini əhatə edən 23 dekabr seçkilərində 1606 bələdiyyəyə 15156 nəfər seçilməlidir.
Seçkilərə Yeni Azərbaycan Partiyası, Demokratik İslahatlar Partiyası, Böyük Quruluş Partiyası, Vətəndaş Birliyi Partiyası, Bütöv Azərbaycan Xalq Cəbhəsi Partiyası, Milli Dirçəliş Hərəkatı Partiyası, Demokratik Maarifçilik Partiyası, Sosial Demokrat Partiyası, Ümid Partiyası, Ana Vətən Partiyası, Vətəndaş Həmrəyliyi Partiyası, Vəhdət Partiyası, Respublikaçılar Partiyası təmsilçiləri, həmçinin partiyasız şəxslər qoşulublar.
Əhalisi 500-dən az olan ərazilərdə 5 bələdiyyə üzvü; 999-dək olan ərazilərdə 7 bələdiyyə üzvü; 4999-dək olan ərazilərdə 9 bələdiyyə üzvü; 9999-dək olan ərazilərdə 11 bələdiyyə üzvü; 19999-dək olan ərazilərdə 13 bələdiyyə üzvü; 49999-dək olan ərazilərdə 15 bələdiyyə üzvü; 99999-dək olan ərazilərdə 17 bələdiyyə üzvü; 299999-dək olan ərazilərdə 19 bələdiyyə üzvü seçiləcək.
