Valeh Ələsgərova müvəqqəti vəzifə verildi
Noyabrın 25-də sərəncam imzalayan prezident İlham Əliyev Valeh Ələsgərovu Ələt azad iqtisadi zonasının müvəqqəti idarəetmə qurumunun sədri təyin edib. Təyinat Ələt azad iqtisadi zonasının səlahiyyətli qurumu və onun İdarə Heyəti formalaşana qədər qüvvədə olacaq.
Novator.az bildirir ki, “Ələt azad iqtisadi zonası haqqında” qanuna görə, ölkə prezidenti Azad Zona səlahiyyətli qurumuna Azad Zona ərazisindən birdəfəlik, əvəzsiz və daimi istifadə hüququ verir.
Səlahiyyətli qurum, Azad Zona inzibati müəssisələri, hüquqi şəxsləri və onların işçiləri, rezidentləri Azad Zonada fəaliyyətlərinə aid olan bütün vergilərdən azaddırlar.
Zonaya idxal edilən mallara, işlərə, xidmətlərə görə gömrük rüsumları və vergilər ödənmir.
Azad Zona səlahiyyətli qurumu ölkə prezidentinin müəyyən etdiyi təşkilati struktura uyğun idarə olunur. Səlahiyyətli qurumun idarə olunmasına, strateji məqsədlərinə çatmasına və fəaliyyətinə görə İdarə Heyəti məsuliyyət daşıyır. İdarə Heyətinə sədri prezident təyin edir.
Valeh Ələsgərov 1946-cı ildə Samux rayonunda anadan olub. Azərbaycan Dövlət Neft və Kimya İnstitutunu bitirib, mühəndisdir. 1970-1991-ci illərdə SSRİ Neft-Qaz Sənayesi Nazirliyinin “Permneft”, “Azneft” istehsalat birliklərində, 1992-2005-ci illərdə “Azərneft” Dövlət Konsernində, Dövlət Neft Şirkətində çalışıb. Əməkdar mühəndisdir.
102 saylı Samux-Şəmkir seçki dairəsindən deputat, Milli Məclisin təbii ehtiyatlar, energetika və ekologiya komitəsinin sədri, Milli Məclis sədrinin müavinidir.
