Elmira Süleymanova 18-ci ilində gedir
Prezident İlham Əliyev insan hüquqları üzrə müvəkkil (ombudsman) postuna üç namizəd irəli sürüb: Bakı Apellyasiya Məhkəməsi sədrinin müavini Kəmalə Abiyeva, Ali Məhkəmənin insan hüquqları və ictimaiyyətlə əlaqələr şöbəsinin müdiri Kəmalə Əliyeva, Konstitusiya Məhkəməsi Aparatı rəhbərinin müavini Səbinə Əliyeva. Təqdimata Milli Məclis baxacaq.
Hazırda ombudsman vəzifəsini 1937-ci il təvəllüdlü Elmira Süleymanova tutur.
Novator.az bildirir ki, “Azərbaycan Respublikasının insan hüquqları üzrə müvəkkili (ombudsman) haqqında” konstitusiya qanununa görə, müvəkkili prezidentin təqdimatı ilə Milli Məclis seçir.
Müvəkkilin səlahiyyət müddəti 7 ildir. Eyni şəxs müvəkkil vəzifəsinə iki dəfədən artıq seçilə bilməz.
Qanuna əsasən, müvəkkilin səlahiyyət müddəti bitdiyi gün yeni müvəkkil seçilmədikdə o, səlahiyyətlərinin icrasını davam etdirir, səlahiyyət müddəti yeni müvəkkilin seçildiyi gündən bitmiş hesab olunur.
Elmira Süleymanova ilk dəfə 2002-ci il iyulun 2-də ombudsman seçilib və postunda 7 il 8 aydan çox oturub, çünki ikinci seçki 2010-cu il martın 5-də olub.
Elmira Süleymanovanın ikinci 7 ili 2017-ci il martın 5-də bitib.
2002-ci il iyulun 2-dən sayanda Elmira Süleymanova 17 il 4 aydan çoxdur ombudsman vəzifəsində çalışır.
