Sosial-iqtisadi hesabatda nələr var?
2019-cu ilin yanvar-oktyabr aylarında Azərbaycanda kənd təsərrüfatının ümumi məhsulu ötən ilin on ayı ilə müqayisədə 7,2 faiz, o cümlədən bitkiçilik məhsullarının istehsalı 11,4 faiz, heyvandarlıq məhsullarının istehsalı 3,2 faiz artıb. Novator.az-ın məlumatına görə, Dövlət Statistika Komitəsi belə hesabat yayıb.
Rəsmi bilgiyə əsasən, on ayda nəqliyyat sektorunda yük daşınması 2018-ci ilin müvafiq dövrü ilə müqayisədə 1,5 faiz, sərnişin daşınması 2,3 faiz artıb.
İnformasiya və rabitə xidmətlərinin həcminin dəyər ifadəsində 16,1 faiz yüksəldiyi vurğulanır.
Qeyd olunur ki, yanvar-oktyabr aylarında əhalinin gəlirləri 2018-ci ilin müvafiq dövrü ilə müqayisədə nominal ifadədə 6,9 faiz artaraq 46,7 milyard manata çatıb.
Hesabata görə, 10 ayda dövlət büdcəsinə 19 milyard 273,9 milyon manat vəsait daxil olub, büdcədən 18 milyard 433,6 milyon manat vəsait xərclənib, büdcənin icrasında 840,3 milyon manatlıq artıqlıq yaranıb.
Oktyabr ayının 1-nə ölkənin bank və digər kredit təşkilatlarının kredit portfeli milli valyuta ekvivalentində 14 milyard 211,3 milyon manat, əhalinin banklardakı əmanətlərinin milli valyuta ekvivalentində məbləği 8 milyard 605,3 milyon manat göstərilir.
