Qaldı 4 yığma
Avropa futbol çempionatının seçmə mərhələsində qrup turniri bitib. Novator.az-ın məlumatına görə, son oyun günü – noyabrın 19-da E qrupundan Uels finala adlayıb. Bu qrupdan ilk vəsiqə Xorvatiyaya qismət olmuşdu.
Final raunduna çıxan digər 18 milli komanda bunlardır: A qrupundan İngiltərə və Çexiya, B qrupundan Ukrayna və Portuqaliya, C qrupundan Almaniya və Hollandiya, D qrupundan İsveçrə və Danimarka, F qrupundan İspaniya və İsveç, G qrupundan Polşa və Avstriya, H qrupundan Fransa və Türkiyə, İ qrupundan Belçika və Rusiya, J qrupundan İtaliya və Finlandiya.
Finala digər 4 vəsiqənin sahibləri 2018-ci ildə UEFA Millətlər Liqasının qrup turnirində ən yaxşı nəticələr göstərmiş komandalar arasında əlavə oyunlarda müəyyənləşəcək. Bu mərhələnin oyunları 2020-ci il martın 26-sı (yarımfinallar) və 31-nə (finallar) təyin olunub.
Qələbə uğrunda yarışacaq dördlüklərdən ikisi bəllidir:
Bosniya, Slovakiya, İrlandiya, Şimali İrlandiya;
Gürcüstan, Şimali Makedoniya, Kosovo, Belarus.
İslandiya, Şotlandiya, Norveç, Serbiya, Bolqarıstan, İsrail, Macarıstan və Rumıniya yığmaları da həmin raundda yer alır.
Avropa çempionatının final mərhələsi 2020-ci ilin yayında Bakı, Sankt-Peterburq, Buxarest, Budapeşt, Kopenhagen, Amsterdam, Münhen, Roma, Bilbao, London, Dublin, Qlazqo şəhərlərində keçiriləcək. Bakı Olimpiya Stadionu 3 qrup oyununa, 1 dörddə bir finala ev sahibliyi edəcək.
