Nöqtə zamanı
Noyabrın 19-da Avropa futbol çempionatının seçmə mərhələsində qrup turniri yekunlaşır. Novator.az-ın məlumatına görə, son oyun gününədək final raunduna çıxan 19 milli komanda bəllidir: A qrupundan İngiltərə və Çexiya, B qrupundan Ukrayna və Portuqaliya, C qrupundan Almaniya və Hollandiya, D qrupundan İsveçrə və Danimarka, E qrupundan Xorvatiya, F qrupundan İspaniya və İsveç, G qrupundan Polşa və Avstriya, H qrupundan Fransa və Türkiyə, İ qrupundan Belçika və Rusiya, J qrupundan İtaliya və Finlandiya.
Finala qruplarda ilk iki yeri tutan yığmalar adlayır.
Azərbaycan yığmasının yer aldığı E qrupundan digər vəsiqə – uğrunda 12 xalla Macarıstan, 11 xalla Uels, 10 xalla Slovakiya mübarizə aparırlar. Bu gün Uels Macarıstanı, Slovakiya Azərbaycanı qəbul edir.
Azərbaycan milli komandası əvvəlki 7 oyunda 1 xal qazanıb.
Avropa çempionatının final mərhələsi 2020-ci ilin yayında Bakı, Sankt-Peterburq, Buxarest, Budapeşt, Kopenhagen, Amsterdam, Münhen, Roma, Bilbao, London, Dublin, Qlazqo şəhərlərində keçiriləcək. Bakı Olimpiya Stadionu 3 qrup oyununa, 1 dörddə bir finala ev sahibliyi edəcək.
Finala digər 4 vəsiqənin sahibləri 2018-ci ildə UEFA Millətlər Liqasının qrup turnirində ən yaxşı nəticələr göstərmiş komandalar arasında əlavə oyunlarda müəyyənləşəcək. Bu mərhələnin oyunları 2020-ci ilin martına təyin olunub.
