İş məhkəməyə getdi
Bakupress.az saytının təsisçisi və baş redaktoru Şəfəq Ağacanın (Ağabalayeva) cinayət işi üzrə ibtidai istintaq başa çatıb. İş Nərimanov Rayon Məhkəməsinə göndərilib. Xəbəri Report.az yayıb.
Novator.az bildirir ki, 1976-cı il təvəllüdlü Şəfəq Ağacan Bakı Slavyan Universitetini filoloq ixtisası ilə bitirib. 10 il Sumqayıtdakı 27 saylı orta məktəbdə rus dili müəllimi işləyib, sonradan jurnalist fəaliyyəti ilə məşğul olub.
Jurnalist bu il mayın 1-i Bakıda tutulub. İttihama görə, o, paytaxtın Nərimanov rayonunda çəkisi 311 qramdan çox olan qurudulmuş marixuananı 100 ABŞ dolları və 1830 manata satarkən yaxalanıb. Xətai Rayon Məhkəməsi Şəfəq Ağacan barəsində həbs qətimkan tədbiri seçib.
Şəfəq Ağacan Cinayət Məcəlləsinin 234.2-ci maddəsi ilə ittiham olunur. Bu maddə üç ildən yeddi ilədək müddətə azadlıqdan məhrumetmə cəzası nəzərdə tutur.
Jurnalist ittihamı qəbul etmir, şərləndiyini deyir.
