Hökumət sözçüsü vəzifədən getdi
Ayaz Mirzəyev Nazirlər Kabinetinin mətbuat xidmətinin rəhbəri postundan azad edilib. Noyabrın 19-da özünün “Facebook” səhifəsində açıqlama yayan Ayaz Mirzəyev çalışdığı müddət ərzində fəaliyyətinə dəstək göstərən keçmiş və indiki rəhbərliyə təşəkkür edib: “Eyni zamanda bu müddət ərzində mətbuat xidməti olaraq mənimlə birgə işləyən, əməkdaşlıq edən həmkarlarıma minnətdarlığımı bildirirəm. Həyatımda əhəmiyyətli rol oynayan dövlət işi təcrübəsi qazandım. Bu vəzifədə bundan sonra fəaliyyət göstərəcək gələcək həmkarıma da bəri başdan uğurlar diləyirəm”.
Ayaz Mirzəyev Nazirlər Kabinetinin mətbuat xidmətin 2019-cu ilin aprel ayından rəhbərlik edib.
Novator.az bildirir ki, 1983-cü il təvəllüdlü Ayaz Mirzəyev Azərbaycan Dövlət İqtisad Universitetinin bakalavr və magistratura pillələrini bitirib. ANS televiziyasında (2016-cı ildə qapadılıb) çalışıb. Azərbaycan Jurnalistlər Şəbəkəsi İctimai Birliyinin sədridir.
Oktyabrın 8-də prezident İlham Əliyev Novruz Məmmədovu öz ərizəsi əsasında baş nazir vəzifəsindən azad edib. Novruz Məmmədov 2018-ci il aprelin 21-dən baş nazir idi.
İlham Əliyevin 8 oktyabr sərəncamı ilə Əli Əsədov baş nazir təyin olunub.
