Aksiya dağıdıldı, aksiya davam edir
Gürcüstan Daxili İşlər Nazirliyinin xüsusi təyinatlı qüvvələri noyabrın 18-i axşam müxalif fəallara qarşı əməliyyat keçirib.
Noyabrın 14-də ölkə parlamenti konstitusiyaya dəyişiklik layihəsini qəbul edə bilməyib. Layihə 2020-ci ildən parlamentin tam proporsional əsasda – partiya siyahıları üzrə seçilməsini nəzərdə tuturdu. Yeniliyin baş tutmaması müxalif qüvvələrin narazılığına səbəb olub və davamlı aksiyalar başlayıb. Əsas tələblər hökumətin istefası, proporsional sistemlə növbədənkənar parlament seçkisinin keçirilməsidir.
Paytaxt Tbilisidə fasiləsiz aksiya keçirən müxalif fəallar noyabrın 18-də parlamenti mühasirəyə alaraq deputatları içəri buraxmayıb. Novator.az-ın məlumatına görə, Daxili İşlər Nazirliyinin xüsusi təyinatlı qüvvələri noyabrın 18-i axşam parlament binasının həndəvərini aksiyaçılardan təmizləyib. Əməliyyat zamanı 2 polisin, 4 aksiyaçının xəsarət aldığı, 37 nəfərin tutulduğu bildirilir.
Parlament binasının ətrafından sıxışdırılan aksiyaçılar yaxınlıqdakı Rustaveli prospektində toplaşıblar. Noyabrın 19-u axşama geniş mitinq təyin olunub.
Gürcüstanda 150 yerlik parlamentin 77 deputatı proporsional, 73 deputatı majoritar (dairələr üzrə) üsulla seçilir. Hökuməti parlamentdə 76 mandat əldə edən partiya formalaşdırır.
2016-cı ilin oktyabrında keçirilmiş son parlament seçkisində Gürcü Arzusu – Demokratik Gürcüstan Partiyası çoxluq əldə edib. 2012-ci ildə qurulmuş partiya həmin ilin oktyabr ayından hakimiyyətdədir. Partiyaya milyarder Bidzina İvanişvili sədrlik edir. Baş nazir postunu bu partiyanın təmsilçisi Georgi Qaxariya tutur. Dövlət başçısı Salome Zurabişvili 2018-ci ilin prezident seçkisində Gürcü Arzusu – Demokratik Gürcüstan Partiyasının namizədi olub.
