İqtisadi göstəricilər açıqlanıb
2019-cu ilin yanvar-oktyabr aylarında Azərbaycanda 65 milyard 415,1 milyon manatlıq və ya əvvəlki ilin eyni dövrü ilə müqayisədə 2,1 faiz çox ümumi daxili məhsul (ÜDM) istehsal edilib. Novator.az-ın məlumatına görə, Dövlət Statistika Komitəsi iqtisadiyyatın neft-qaz sektorunda 0,2 faiz, digər sektorunda 3,5 faiz artım qeydə alıb.
Hesabatda bildirilir ki, informasiya və rabitə sahələrində əlavə dəyər 16,1 faiz, kənd təsərrüfatı, meşə təsərrüfatı və balıqçılıq sahələrində 7,3 faiz, turistlərin yerləşdirilməsi və ictimai iaşə sahələrində 5,5 faiz, ticarət; nəqliyyat vasitələrinin təmiri sahələrində 3,1 faiz, sənayedə 1,7 faiz, nəqliyyat və anbar təsərrüfatı sahələrində 0,5 faiz, digər xidmət sahələrində 3 faiz yüksəlib, tikintidə isə 6,2 faiz azalıb.
Əhalinin hər nəfərinə düşən ÜDM 6609,6 manat göstərilir.
2003-cü ildə ÜDM-in artımı 11,2 faiz təşkil edib. 2004-cü ildə 10,2 faiz, 2005-ci ildə 26,4 faiz, 2006-cı ildə 34,5 faiz, 2007-ci ildə 25 faiz, 2008-ci ildə 10,8 faiz, 2009-cu ildə 9,3 faiz, 2010-cu ildə 5 faiz artım olub.
2011-ci ildə ÜDM-in həcmi 0,1 faiz, 2012-ci ildə 2,2 faiz, 2013-cü ildə 5,8 faiz, 2014-cü ildə 2,8 faiz, 2015-ci ildə 1,1 faiz artıb.
2016-cı ildə Azərbaycanda ÜDM istehsalı 2015-ci ilə nisbətən 3,1 faiz düşüb.
2017-ci ildə əvvəlki illə müqayisədə 0,2 faiz çox ümumi daxili məhsul istehsal olunub.
2018-ci ildə 2017-ci illə müqayisədə 1,4 faiz çox ÜDM istehsalı qeydə alınıb.
