Hakimlər cəzalandırılıb
4 hakim Məhkəmə-Hüquq Şurasının 14 noyabr iclasında töhmət alıb. Qərarlar həmin hakimlərin qanunvericiliyin kobud pozulmasına, süründürməçiliyə və digər neqativ hallara yol verməsi ilə əsaslandırılıb.
Başqa bir qərara əsasən, Suraxanı Rayon Məhkəməsinin hakimi Ramil Həsənovun hakimlik səlahiyyətlərinə vaxtından əvvəl xitam verilib. Onun Etik Davranış Kodeksinin tələblərini pozduğu, hakim adına ləkə gətirən hərəkətlərə yol verdiyi bəyan olunub.
2 hakim barədə isə intizam icraatları başlanıb.
Novator.az bildirir ki, Məhkəmə-Hüquq Şurası vakant hakim vəzifələrinə hakim olmayan namizədlərin seçilməsinin təşkili, hakimlərin fəaliyyətinin qiymətləndirilməsi, onların iş yerinin dəyişdirilməsi, vəzifədə irəli çəkilməsi, intizam məsuliyyətinə cəlb edilməsi funksiyalarını həyata keçirən orqandır. Ədliyyə naziri Fikrət Məmmədovun sədrlik etdiyi quruma Ramiz Rzayev (Ali Məhkəmənin sədri), Fuad Ələsgərov (Prezident Administrasiyasının şöbə müdiri), Ziyafət Əsgərov (Milli Məclis sədrinin birinci müavini), Anar Bağırov (Vəkillər Kollegiyası Rəyasət Heyətinin sədri) və başqa şəxslər daxildir.
