22 illik baş redaktor posta qayıtdı
Rusiyada müxalif nəşr “Novaya qazeta”ya yeni baş redaktor seçilib. Novator.az-ın məlumatına görə, redaksiyada noyabrın 15-də keçirilən gizli səsvermədə Dmitri Muratov qalib gəlib. O, 74 əməkdaşın səsini qazanıb. 2017-ci ildən baş redaktor olan Sergey Kojeurovu 51, xüsusi müxbir İlya Azarı 13 nəfər dəstəkləyib.
1961-ci il təvəllüdlü Dmitri Muratov “Novaya qazeta”nın yaradıcılarından biridir. O, 1995-2017-ci illərdə baş redaktor postunu tutub.
1993-cü ildən çıxan “Novaya qazeta”da baş redaktor seçkisi 2009-cu ildən tətbiq olunur. Baş redaktorun səlahiyyət müddəti 2 ildir.
Jurnalist araşdırmaları ilə tanınan “Novaya qazeta” həftənin bir, üç və beşinci günləri işıq üzü görür.
Səidə Hüseynova
