Orta maaş göstəricisi açıqlandı
Dövlət Statistika Komitəsi iqtisadiyyatda işləyənlərin sayı və əməkhaqqı barədə hesabat yayıb. Novator.az bildirir ki, rəsmi açıqlamaya görə, 2019-cu il oktyabrın 1-nə ölkə iqtisadiyyatında muzdla çalışan işçilərin sayı 1 milyon 639,1 min nəfərə çatıb, onların 20,2 faizi təhsil, 17,8 faizi ticarət; nəqliyyat vasitələrinin təmiri, 13,3 faizi sənaye, 8,2 faizi əhaliyə səhiyyə və sosial xidmətlərin göstərilməsi, 7,6 faizi tikinti, 6,9 faizi dövlət idarəetməsi və müdafiə; sosial təminat, 4,6 faizi nəqliyyat və anbar təsərrüfatı, 3,4 faizi peşə fəaliyyəti, elmi və texniki fəaliyyət, 3,3 faizi kənd təsərrüfatı, meşə təsərrüfatı və balıqçılıq, 1,7 faizi maliyyə və sığorta fəaliyyəti, 13 faizi iqtisadiyyatın digər sahələrində məşğul olub.
2019-cu ilin yanvar-sentyabr aylarında muzdla işləyənlərin orta aylıq nominal əməkhaqqının 2018-ci ilin müvafiq dövrünə nisbətən 11,7 faiz artaraq 603,5 manata yüksəldiyi vurğulanır.
Dövlət Statistika Komitəsi qeyd edir ki, sentyabrın 1-dən minimum aylıq əməkhaqqı məbləğinin 250 manata qaldırılması və başqa artımlar nəticəsində həmin ay ölkə üzrə orta aylıq nominal əməkhaqqı 723,4 manata çatıb.
