Boliviyanın yeni rəhbəri
Boliviyada prezident səlahiyyətləri parlamentin yuxarı palatasının – Senatın sədr müavini Janin Anyesə həvalə olunub.
Noyabrın 10-da prezidentlikdən əl çəkən Evo Morales Meksikaya sığınıb.
1959-cu il təvəllüdlü Evo Morales ilk dəfə 2005-ci ildə prezident seçilib. Onun ilk hakimiyyəti dövründə konstitusiya dəyişdirilib, eyni şəxsin ardıcıl iki dəfə prezident seçilməsinə yasaq götürülüb.
2009-cu il seçkisində Evo Morales yenidən prezident kürsüsünü tutub. Bu, məhkəmə qərarı ilə ilk müddət sayıldığı üçün Evo Morales 2014-cü ildə üçüncü dəfə prezident seçilə bilib.
2016-cı ildə prezident seçilməyə hər hansı müddət məhdudiyyətini götürən konstitusiya referendumu keçirilib.
Evo Morales 2019-cu il oktyabrın 20-də keçirilən prezident seçkisinin qalibi elan olunandan sonra ölkə qarışıb. Müxalifət rəsmi nəticələri tanımayıb, ölkədə kütləvi etiraz aksiyaları başlayıb. Davamlı aksiyalar nəticəsində Evo Morales noyabrın 10-da istefa verməyə məcbur olub.
Novator.az bildirir ki, dövlət başçısı ilə yanaşı vitse-prezident, Senatın sədri, onun birinci müavini, parlamentin aşağı palatasının spikeri istefaya getdiyi üçün prezident səlahiyyətləri Senat sədrinin müavini Janin Anyesə keçib. Konstitusiya Məhkəməsi və Boliviya Silahlı Qüvvələrinin komandanlığı onu müvəqqəti dövlət başçısı kimi tanıyıb.
Janin Anyes 1967-ci ildə doğulub. Hüquqşünasdır. 2010-cu ildən Senatın üzvüdür.
Cənubi Amerika ölkəsi olan Boliviyanın ərazisi 1,09 milyon kvadrat kilometr, ərazisi 11,4 milyon nəfərdir.
Səidə Hüseynova
