Müsavatın aksiyası: tutulanlar var
Müsavat başqanı Arif Hacılı noyabrın 12-də tutulub. “Basta” saytının məlumatına görə, saat 13:30 radələrində Arif Hacılının maşınını Dövlət Yol Polisinin əməkdaşları saxlayıb. Avtomobilindən düşürülən Arif Hacılını mülki geyimli şəxslərin başqa bir maşınla naməlum istiqamətdə apardığı bildirilir.
Müsavat Partiyası noyabrın 10-u paytaxtda siyasi məhbuslara azadlıq, repressiyalara son, seçki islahatları tələbləri ilə mitinq keçirmək niyyətində idi. Bakı Şəhər İcra Hakimiyyətinə müraciətdə aksiya üçün bu ünvanlar göstərilmişdi: Tofiq Bəhramov adına stadionun qarşısındakı meydan, metronun “Dərnəgül” stansiyasının yaxınlığındakı meydan və Yasamal rayonundakı İdman-Sağlamlıq Kompleksinin stadionu.
Paytaxt rəhbərliyi mitinqi Qaradağ rayonunun Lökbatan qəsəbəsində, “Neftçi” İdman Klubu Birliyinin Qaradağ Təlim-İdman Bazasının stadionunda keçirməyi məsləhət görüb. Bu təkliflə razılaşmayan Müsavat Partiyası noyabrın 12-nə Bakı Şəhər İcra Hakimiyyətinin binası qarşısına etiraz piketi təyin edib. Paytaxt rəhbərliyi piketlə bağlı müraciəti də mənfi cavablandırıb və Müsavat sanksiyasız aksiya keçirməyə qərar verib.
“Basta” bildirir ki, noyabrın 11-də Müsavat başqanının müavini Razim Əmiraslanlı yoxa çıxıb. Noyabrın 12-də bir neçə Müsavat funksioneri, o cümlədən partiyanın sözçüsü, Divan üzvü Mustafa Hacıbəyli tutulub, partiyanın 7-ci mikrorayondakı mərkəzi qərargahı polis nəzarətinə alınıb.
Saat 15 radələrində bir qrup müsavatçı Bakı metrosunun “İçərişəhər” stansiyasından paytaxtın icra hakimiyyətinin binasına doğru irəliləməyə cəhd göstərib. Polis buna imkan verməyib. Saxlananlar var.
