İcra hakimiyyətlərində yerdəyişmələr
Prezident İlham Əliyev İlqar Namaz oğlu Abbasovu Suraxanı Rayon İcra Hakimiyyətinin başçısı vəzifəsindən azad edib. Noyabrın 12-də imzalanan digər sərəncamla İlqar Abbasov Şirvan Şəhər İcra Hakimiyyətinin başçısı postuna təyinat alıb.
Şirvan Şəhər İcra Hakimiyyətinin başçısı vəzifəsindən çıxarılan Mərdan Talıb oğlu Camalov Zərdab Rayon İcra Hakimiyyətinin başçısı postunda Lütvəli Babəli oğlu Babayevi əvəzləyib.
Başqa bir sərəncamla Əziz İmran oğlu Əzizov Yasamal Rayon İcra Hakimiyyətinin başçısı vəzifəsindən çıxarılaraq Suraxanı Rayon İcra Hakimiyyətinin başçısı təyin olunub. Yasamal Rayon İcra Hakimiyyətinin başçısı vəzifəsinə isə Elşad Eldar oğlu Həsənov təyinat alıb.
1976-cı il təvəllüdlü Elşad Həsənov Bakı Dövlət Universitetinin məzunu, hüquq elmləri namizədidir. 2015-ci ildən 17 saylı Yasamal üçüncü seçki dairəsindən deputatdır.
Rafiq Çəpərxan oğlu Quliyev Xətai Rayon İcra Hakimiyyətinin başçısı vəzifəsinə gətirilib. 1974-cü il təvəllüdlü Rafiq Quliyev bu təyinata qədər Xətai Rayon İcra Hakimiyyəti başçısının birinci müavini idi.
Novator.az bildirir ki, Xətai Rayon İcra Hakimiyyətinin başçısı vəzifəsi 2018-ci il dekabrın 13-də Razim İsa oğlu Məmmədov çıxarılandan boş qalmışdı.
