Büdcə sənədləri parlament müzakirəsində
Noyabrın 12-də Milli Məclis 2020-ci ilin dövlət büdcəsinin və büdcə zərfinə daxil olan digər qanun layihələrinin müzakirəsinə başlayıb.
AZƏRTAC-ın məlumatına görə, iclasda çıxış edən maliyyə naziri Samir Şərifov deyib ki, 2020-ci ilin dövlət büdcəsi layihəsində gəlirlərin 43,9 faizi qeyri-neft sektoru üzrə daxilolmaların, 56,1 faizi neft gəlirlərinin payına düşür. O, vergi orqanlarının xətti ilə büdcəyə 7 milyard 875 milyon manat, gömrük orqanlarının xətti ilə 4 milyard manat daxilolma gözləndiyini vurğulayıb.
2020-ci ilin dövlət büdcəsi layihəsində gəlir proqnozu 24 milyard 134,5 milyon manatdır. Novator.az-ın məlumatına görə, Dövlət Neft Fondundan 11 milyard 350 milyon manat köçürmə nəzərdə tutulur.
26 milyard 913,7 milyon manatlıq xərclərin istiqamətləri belə müəyyən edilir:
iqtisadi fəaliyyət – 5 milyard 602,4 milyon manat;
ümumi dövlət xidmətləri – 4 milyard 27,2 milyon manat;
müdafiə və milli təhlükəsizlik – 3 milyard 853,5 milyon manat;
sosial müdafiə və sosial təminat – 3 milyard 244,5 milyon manat;
təhsil – 3 milyard 155,7 milyon manat;
məhkəmə hakimiyyəti, hüquq mühafizə və prokurorluq – 1 milyard 973 milyon manat;
səhiyyə – 1 milyard 369 milyon manat
kənd təsərrüfatı – 920,9 milyon manat
mədəniyyət, incəsənət, informasiya, bədən tərbiyəsi, gənclər siyasəti və bu qəbildən olan digər fəaliyyət – 439,1 milyon manat;
ətraf mühitin mühafizəsi – 279,8 milyon manat;
mənzil və kommunal təsərrüfatı – 249,1 milyon manat;
əsas bölmələrə aid edilməyən xərclər – 1 milyard 798,7 milyon manat.
