Baş nazir hökumət layihəsinə qurban getdi
Moldova parlamenti noyabrın 12-də hökumətə etimadsızlıq göstərib. Novator.az-ın məlumatına görə, qərarı 101 yerlik parlamentin 63 deputatı dəstəkləyib.
Bu il fevralın 24-də seçilmiş parlamentdə Rusiyaya yaxınlığı ilə tanınan Sosialist Partiyası 36 mandata sahibdir. Qərbə yaxın qurumlardan Demokrat Partiyasının 30, ACUM blokunun 26 mandatı var. Şor Partiyası parlamentdə 7 mandatla, partiyasız şəxslər 2 mandatla təmsil olunur.
İyun ayında Sosialist Partiyası ilə ACUM bloku parlament çoxluğu formalaşdıraraq yeni hökumət qurublar. Sosialist Partiyasının sədri Zinaida Qreçanıy parlament sədri seçilib, ACUM blokundan Mayya Sandu baş nazir postuna gətirilib.
Etimadsızlıq təşəbbüsü sosialistlərdən gəlib. Onlar hökuməti, konkret olaraq baş nazir Mayya Sandunu ədliyyə islahatlarının iflasında günahlandırır. Hökumətin “Prokurorluq haqqında” qanuna təklif etdiyi dəyişiklik layihəsində baş prokuror postuna namizədlərin ilkin seçimini baş nazirin aparması nəzərdə tutulub. Sosialistlər bunu narazılıqla qarşılayıblar.
2016-cı ildən Moldovada prezident postunu Sosialist Partiyasının dəstəklədiyi İqor Dodon tutur.
