Yenə “yox”
Bakı Şəhər İcra Hakimiyyəti Müsavat Partiyasının daha bir aksiyasına “yox” deyib.
Müsavat noyabrın 10-u paytaxtda siyasi məhbuslara azadlıq, repressiyalara son, seçki islahatları tələbləri ilə mitinq keçirmək niyyətində idi. Bakı Şəhər İcra Hakimiyyətinə müraciətdə aksiya üçün bu ünvanlar göstərilmişdi: Tofiq Bəhramov adına stadionun qarşısındakı meydan, metronun “Dərnəgül” stansiyasının yaxınlığındakı meydan və Yasamal rayonundakı İdman-Sağlamlıq Kompleksinin stadionu.
Bakı Şəhər İcra Hakimiyyətinin təşkilatçılara cavabında qeyd olunub ki, Yasamal rayonundakı İdman-Sağlamlıq Kompleksinin stadionunda təmir işləri gedir, digər iki meydan isə nəqliyyatın sıx hərəkət etdiyi ərazilərdir. Paytaxt rəhbərliyi mitinqi Qaradağ rayonunun Lökbatan qəsəbəsində, “Neftçi” İdman Klubu Birliyinin Qaradağ Təlim-İdman Bazasının stadionunda keçirməyi məsləhət görüb. Bu təkliflə razılaşmayan Müsavat Partiyası noyabrın 12-nə Bakı Şəhər İcra Hakimiyyətinin binası qarşısına etiraz piketi təyin edib.
Paytaxt rəhbərliyi piketlə bağlı müraciəti noyabrın 7-də cavablandırıb. Məktubda bildirilir ki, Bakı Şəhər İcra Hakimiyyətinin yerləşdiyi ərazidə təhsil müəssisələrinin mövcudluğu, piyadaların sıxlığı, nəqliyyatın intensivliyi ictimai asayişin təmin edilməsini çətinləşdirir və orada piketin keçirilməsi məqsədəuyğun deyil.
Cavabdan narazı qalan Müsavat Partiyası noyabrın 12-də Bakı Şəhər İcra Hakimiyyətinin qarşısında sanksiyasız aksiya keçirməyə qərar verib. Aksiya saat 15-ə təyin olunub.
Novator.az bildirir ki, Bakı Şəhər İcra Hakimiyyəti bu il Müsavat Partiyasının iki yürüş-mitinqinə, bir mitinqinə, iki piketinə də imkan verməyib.
