UEFA-nın klub reytinqi
Novator.az yenidən UEFA-nın klub reytinqinə nəzər salıb.
2019-2020-ci illər mövsümündə klub turnirlərinə 237 komanda buraxılıb. Mübarizəni qrup raundlarında 55 UEFA üzvündən 29-nun təmsilçiləri davam etdirir: Çempionlar Liqasında 32, Avropa Liqasında 48 klub oynayır.
Çempionlar Liqası və Avropa Liqasının qrup mərhələlərində dörd turun ardından reytinqə İspaniya başçılıq edir.
Turnirlərdə klubları qalan Rusiya 7-ci, Ukrayna 10-cu, Türkiyə 11-ci, Qazaxıstan 25-ci, Azərbaycan 26-cı yerdədir.
Klub reytinqi Çempionlar Liqası və Avropa Liqasında son beş mövsümdə qazanılan əmsala əsaslanır. Qrup raunduna qədər qələbə 1, heç-heçə 0,5 xal; qrupda və sonrakı mərhələlərdə qələbə 2, heç-heçə 1 xaldır.
Çempionlar Liqasının qrupuna düşmək 4 bonus xalı, 1/8 finala çıxmaq 5 bonus xalı, hər iki turnirin 1/4 finalına, yarımfinalına və finalına yüksəlmək 1 bonus xalı verir.
Toplanan xallar qitə turnirlərinə vəsiqə almış ölkə klublarının sayına bölünür və mində bir dəqiqliklə əmsal çıxarılır.
Mövsümün əmsallar cədvəlində İngiltərə öndədir: 9,285 əmsal.
Azərbaycan bu mövsüm 3,125 əmsal qazanıb.
Ölkə UEFA-nın klub turnirlərinə 4 komanda ilə qatılıb. Qrup raundunadək “Qarabağ” gəlib çıxa bilib. Azərbaycan təmsilçisi Avropa Liqasının A qrupunda İspaniyanın “Sevilya”, Kiprin APOEL və Lüksemburqun “Düdelanj” komandaları ilə yarışır, 4 xalla üçüncü pillədədir və növbəti raunda çıxmaq şansını saxlayır.
