“Qarabağ”ın qrupdan çıxmaq şansları
UEFA Avropa Liqasının qrup mərhələsində sona iki tur qalır. Azərbaycan təmsilçisi “Qarabağ”ın yer aldığı A qrupunda dörd oyuna 12 xal yığan İspaniya “Sevilya”sı birinci yeri təmin edərək növbəti raunda çıxıb. Qrupda ikinci yeri tutan komanda da 1/16 finala adlayacaq. Hazırda Kiprin APOEL komandası və “Qarabağ”ın 4, Lüksemburqun “Düdelanj” klubunun 3 xalı var.
Qalan oyunların təqvimi belədir:
28 noyabr
“Sevilya” – “Qarabağ”
“Düdelanj” – APOEL
12 dekabr
APOEL – “Sevilya”
“Qarabağ” – “Düdelanj”.
Futbol icmalçısı Rasim Mövsümzadə Novator.az-a deyib ki, “Qarabağ” qalan iki oyunda 1 xal qazanacağı halda da qrupda 2-ci yeri tutaraq növbəti mərhələyə çıxa bilər: “Təmsilçimizin səfərdə “Sevilya”ya məğlub olub, evdə “Düdelanj”la heç-heçə etməsi nəzərdə tutulur – bu zaman yekunda “Qarabağı”ın 5 xalı olacaq. Amma həmçinin “Düdelanj” – APOEL matçının heç-heçə bitməsi və APOEL-in evdə “Sevilya”ya uduzması da şərtdir. Bu halda həm ümumi yekunda, həm də şəxsi görüşlərdə APOEL və “Düdelanj”la eyni xalı olacaq “Qarabağ” onlarla öz aralarındakı oyunlarda daha yaxşı top fərqinə görə qrupda 2-ci yeri tutacaq. İlk turda APOEL evdə “Düdelanj”a 3:4 hesabı ilə məğlub olub, ikinci turda isə “Qarabağ” səfərdə Lüksemburq təmsilçisini yenib – 4:1.
“Qarabağ” Bakıda “Düdelanj”a qalib gəlsə və yekunda 7 xalı olsa, APOEL-in qalan iki oyunda qalib gəlməməsinə ümid etməlidir. Azərbaycan çempionu hətta İspaniyada “Sevilya”nı məğlub edib xalını 10-a çatdırsa belə, yenə də Kipr təmsilçisinin büdrəməsinə ümid etməlidir. Çünki sonda iki komandanın xalı eyni olsa, şəxsi görüşlərdəki üstünlüyə görə (2:1, 2:2) APOEL yoluna davam edəcək”.
