Sükutun 20 ayı
Noyabrın 7-də ABŞ dollarının rəsmi məzənnəsi 1,7 manat həddində qalıb. Novator.az bildirir ki, bununla qiymət sabitliyinin 20 ayı tamam olub.
2015-ci ildə Azərbaycan valyutasının devalvasiyalara uğraması nəticəsində dolların rəsmi kursu 0,7844 manatdan 1,5594 manata qalxıb.
2016-cı ildə rəsmi qiymət 1,7707 manata çatıb.
2017-ci ilin fevralında ilk devalvasiyadan sonra ən yuxarı rəsmi qiymət qeydə alınıb: 1,92 manat. Həmin ili 1,7001 manatla yola salan dollar 2018-ci il martın 7-dən 1,7 manata satılır.
Avro 2019-cu ilə 1,9323 manatla başlayıb.
25-29 aprel arası, mayın 3-də, 20-24 və 29-31 may, 24 iyul-5 avqust arası avro 1 manat 90 qəpikdən ucuz satılıb. Avqustun 14-dən rəsmi məzənnə yenə 1 manat 90 qəpikdən aşağıdır.
Gürcüstan larisi 0,6346, Rusiya rublu 0,0245, Türkiyə lirəsi 0,3141 manatla start götürüb.
Dövlət Neft Fondu manatın qorunması üçün Mərkəzi Bankın 2019-cu ilin yanvar-oktyabr aylarında keçirdiyi valyuta hərraclarında 5 milyard 167,6 milyon ABŞ dolları məbləğində vəsait satıb.
2016-cı ildə Dövlət Neft Fondunun analoji xərci 4,9 milyard dollar, 2017-ci ildə 3,6 milyard dollar, 2018-ci ildə 6,5 milyard dollar göstərilib.
Mərkəzi Bankın hesabatına görə, 2019-cu il noyabrın 1-nə valyuta ehtiyatının həcmi 6 milyard 144,7 milyon dollar olub. Bu, 2015-ci ilin dekabr ayından bəri ən yuxarı rəqəmdir. 2015-ci ilin əvvəlində 13 milyard 758,3 milyon dollar valyuta ehtiyatı qeydə alınıb. İlin sonuna ehtiyatın həcmi 5 milyard 16,7 milyon dollara enib.
2017-ci il yanvarın 1-nə ehtiyatın həcmi 3 milyard 974,4 milyon dollar olub, 2018-ci il 5 milyard 334,6 milyon dollarla, 2019-cu il 5 milyard 625,7 milyon dollarla yola çıxıb.
