Qulu Məhərrəmlinin yubileyi qeyd olunub
Bakı Dövlət Universitetinin jurnalistika fakültəsində əməkdar jurnalist, filologiya üzrə elmlər doktoru, professor Qulu Məhərrəmlinin 65 illik yubileyi münasibətilə tədbir keçirilib.
Jurnalistika fakültəsinin dekanı, filologiya üzrə elmlər doktoru Vüqar Zifəroğlu tədbiri açaraq Qulu Məhərrəmlinin həyat və yaradıcılığından, onun neçə-neçə gənc jurnalistin yetişməsində, bilik və bacarığının artırılmasındakı rolundan danışıb, qeyd edib ki, praktik jurnalistika ilə yanaşı elmi-pedaqoji fəaliyyətlə də məşğul olan Qulu Məhərrəmli elmi araşdırmalarında jurnalistikanın ümumi nəzəriyyəsi, media konsepti, teleradionun tarixi, ekran-efirin aktual elmi-nəzəri problemləri, o cümlədən mürəkkəb dil sisteminin öyrənilməsi məsələlərinə diqqət ayırıb.
Yubilyarın həyat və yaradıcılığına həsr edilmiş video çarxın nümayişindən sonra tədbir iştirakçılarına Qulu Məhrrəmlinin 65 illik yubileyinə həsr edilmiş “Kredo” qəzetinin xüsusi buraxılışı təqdim olunub.
Tədbirin moderatoru, BDU-nun jurnalistika fakültəsinin televiziya və radio jurnalistikası kafedrasının müdiri, professor Allahverdi Məmmədli çıxışında qeyd edib ki, Qulu Məhərrəmli ömrünü Azərbaycan televiziya jurnalistikasının inkişafına həsr etmiş qələm sahibidir: “Mətbuatda imzası ilə möhür vuran Qulu müəllim jurnalist fəaliyyəti ərzində məşğul olduğu peşənin qayda və tələblərinə sadiq olub, sənətinin öhdəsindən ustalıqla gəlib”.
“Kredo” qəzetinin baş redaktoru Əli Rza Xələfli təbrik nitqində qeyd edib ki, Qulu Məhərrəmli işlədiyi bütün vəzifələrdə peşəkarlığını ortaya qoyub, işində tələbkarlığı ilə seçilib, cəmiyyətdə həmişə ləyaqətli yer tutub, şərəfli ömür yaşayıb və yaşayır.
Tədbirdə iştirak edən biologiya elmləri doktoru, akademik Elşad Qurbanov, professorlar Həmid Vəliyev, Nəsir Əhmədli, BDU-nun jurnalistika fakültəsinin dekan müavini Sevinc Əliyeva, Azərbaycan Dövlət Televiziyasının əməkdaşı Natəvan Dəmirçioğlu, “Multimedia” İnformasiya Sistemləri Texnologiyaları Mərkəzinin direktoru Osman Gündüz, ATV+ Kabel televiziyasının bədii rəhbəri Nəmənd Rüstəmov, Azərbaycan Televiziya və Radio Verilişləri QSC-nin Teleradio Akademiyasının prorektoru Sevinc Məmmədova, dosentlər Billurə Aslan, Sevil Həsənova, jurnalistika fakültəsinin IV kurs tələbəsi Şəbnəm Qurbansoy və başqaları həmkarları haqqında dəyərli fikirlər səsləndirib, onun Azərbaycan jurnalistikasının inkişafındakı xidmətlərini yüksək qiymətləndirib və ona xoş arzularını çatdırıblar.
Sonda çıxış edən yubilyar ona göstərilən diqqətə görə fakültə rəhbərliyinə, tədbirin təşkikatçılarına və iştirakçılara öz təşəkürünü bildirib.
Qulu Məhərrəmli media problemlərinə həsr edilmiş nüfuzlu beynəlxalq toplantılarda, media forumlarında dəfələrlə Azərbaycan jurnalistikasını və jurnalistika elmini təmsil edib. Media problemləri, o cümlədən telejurnalistika üzrə ekspertlərdən biridir. Jurnalistika sahəsində ən yüksək mükafatlara layiq görülüb. 30-dan çox kitabın, o cümlədən bir neçə monoqrafiya, dərslik, dərs vəsaiti, həmçinin izahlı və etimoloji lüğətlərin müəllifi olan professorun əsərləri ingilis, rus, çex, fars və koreya dillərində çap edilib.
Mənbə: Journalism.bsu.edu.az
