İlk vəsiqələr
UEFA Çempionlar Liqasında qrup raundunun dördüncü turu yekunlaşıb. Novator.az-ın məlumatına görə, A qrupunda yer alan Türkiyənin “Qalatasaray“ komandası noyabrın 6-sı İspaniya paytaxtı Madriddə “Real”a 0:6 hesabı ilə uduzaraq növbəti mərhələyə çıxmaq şansını itirib. Öz meydanında “Brügge”ni (Belçika) 1:0 hesabı ilə yenən PSJ (Fransa) isə 1/8 finala adlayıb.
Dörd oyundan sonra PSJ 12 xalla liderdir. “Real”ın 7, “Brügge”nin 2, “Qalatasaray”ın 1 xalı var.
Qrupda ilk iki yeri tutan komandalar 1/8 finala keçir, üçüncü yerin sahibi isə Avropa Liqasına ələnir.
6 noyabr oyunlarından sonra B qrupunda 12 xalı olan “Bavariya” (Almaniya) növbəti raunda vəsiqə əldə edib. “Tottenhem” (İngiltərə) 7, “Srvena Zvezda” (Serbiya) 3, “Olimpiakos” (Yunanıstan) 1 xal yığıb.
C qrupunda “Mançester Siti” (İngiltərə) 10, “Şaxtyor” (Ukrayna) və “Dinamo” (Xorvatiya) 5, “Atalanta” (İtaliya) 1 xal götürüb.
D qrupunda 10 xalı olan “Yuventus” (İtaliya) növbəti mərhələyə çıxıb. “Atletiko” 7, “Lokomotiv” (Moskva, Rusiya) və “Bayer” (Almaniya) 3 xal alıb.
