Oqtay Gülalıyev İstanbula aparıldı
Hüquq müdafiəçisi Oqtay Gülalıyev müalicə üçün Türkiyənin İstanbul şəhərinin Avrasiya Hospitalına aparılıb. Məlumatı APA noyabrın 6-da yayıb.
Oqtay Gülalıyev müxalif görüşləri ilə tanınır. Demokratik Qüvvələrin Milli Şurasının üzvü, Repressiya və İşgəncələr Əleyhinə Komitənin koordinatorudur.
2019-cu il oktyabrın 29-u axşam Oqtay Gülalıyevi Bakıda minik avtomobili vurub. Hadisə hüquq müdafiəçisi yolu keçərkən, piyada xəttinin üstündə baş verib. Bakı Şəhər Baş Polis İdarəsinin məlumatına görə, Oqtay Gülalıyev taksi fəaliyyəti ilə məşğul olan sürücü Kənan Abdullayevin idarə etdiyi “Hyundai Accent” markalı avtomobillə vurulub. Sürücü Oqtay Gülalıyevi Kliniki Tibbi Mərkəzə çatdırıb. İlkin tibbi yardım göstərildikdən sonra Oqtay Gülalıyev qapalı kəllə-beyin travması, baş beynin əzilməsi, sol təpə sümüyündə sınıq, sol yarımkürədə çoxsaylı qansızmalar diaqnozu ilə “City Hospital”a köçürülüb, oktyabrın 30-u orada əməliyyat olunub.
Noyabrın 1-dən Oqtay Gülalıyev Respublika Neyrocərrahiyyə Xəstəxanasının reanimasiya şöbəsində müalicə olunur, koma vəziyyətindədir.
Birinci vitse-prezident Mehriban Əliyevanın rəhbərlik etdiyi Heydər Əliyev Fondunun nümayəndələri noyabrın 5-də Oqtay Gülalıyevin həyat yoldaşı Firuzə Gülalıyeva ilə görüşüblər. Fonddan APA-ya verilən açıqlamaya görə, ailəsinin müraciəti nəzərə alınaraq Oqtay Gülalıyevin müalicəsinə dəstək üçün Türkiyənin İstanbul şəhərindən həkim dəvət olunub. Müayinədən sonra Oqtay Gülalıyevin müalicəsinin Türkiyədə davam etdirilməsinə qərar verilib. Mehriban Əliyevanın tapşırığı ilə Oqtay Gülalıyevin Türkiyəyə aparılması üçün xüsusi təyyarə ayrılıb.
Oqtay Gülalıyevin vəziyyəti necədir?
Oqtay Gülalıyevin işi: maddədə nə deyilir?
Oqtay Gülalıyev reanimasiya şöbəsindədir
Oqtay Gülalıyevin vəziyyəti ilə bağlı açıqlamalar
