Müsavata Lökbatan təklif olundu
Bakı Şəhər İcra Hakimiyyəti Müsavat Partiyasının noyabrın 10-na təyin etdiyi mitinqə yer ayırmaq təklifinə rəsmi cavab verib. “Basta”nın məlumatına görə, paytaxt rəhbərliyi mitinqi Qaradağ rayonunun Lökbatan qəsəbəsində, “Neftçi” İdman Klubu Birliyinin Qaradağ Təlim-İdman Bazasının stadionunda keçirməyi məsləhət görüb. Bu təklifdən imtina edən Müsavat Partiyası noyabrın 12-də Bakı Şəhər İcra Hakimiyyətinin binası qarşısında etiraz piketi keçirmək niyyətindədir.
Müsavat 10 noyabr mitinqinin əsas tələblərinin siyasi məhbusların azadlığa buraxılması, repressiyalara son qoyulması, seçki qanunvericiliyində islahatlar olacağını bəyan etmiş, Bakı Şəhər İcra Hakimiyyətinə müraciətdə aksiya üçün üç ünvan göstərmişdi: Tofiq Bəhramov adına stadionun qarşısındakı meydan, metronun “Dərnəgül” stansiyasının yaxınlığındakı meydan və Yasamal rayonundakı İdman-Sağlamlıq Kompleksinin stadionu.
Bakı Şəhər İcra Hakimiyyətinin noyabrın 6-da təşkilatçılara göndərdiyi cavab məktubunda qeyd olunub ki, Yasamal rayonundakı İdman-Sağlamlıq Kompleksinin stadionunda təmir işləri gedir, digər iki meydan isə nəqliyyatın sıx hərəkət etdiyi ərazilərdir.
