REAL növbədənkənar qurultaya gedir
Respublikaçı Alternativ Partiyası (REAL Partiya) növbədənkənar qurultaya gedir. Qərar partiya Məclisinin 3 noyabr iclasında çıxarılıb, İdarə Heyətinin 5 üzvündən ibarət təşkilat komitəsi yaradılıb.
Növbədənkənar qurultay sədr İlqar Məmmədovun təklifidir, o, partiyanın strukturunu yeniləmək, bunun üçün nizamnaməni dəyişmək təşəbbüsü irəli sürüb.
Novator.az bildirir ki, REAL Partiya 2018-ci ildə Respublikaçı Alternativ Hərəkatının bazasında yaradılıb, ancaq dövlət qeydiyyatına alınmaq üçün Ədliyyə Nazirliyinə müraciət etməyib.
Hökumət qurumları yer ayırmadığı üçün partiyanın təsis qurultayı 2018-ci il aprelin 7-də internetlə keçirilib, nizamnamə, proqram və atributlar qəbul edilib, seçki komissiyası formalaşıb. Aprelin 8-də isə təşkilatın Bakıdakı ofisində gizli səsvermə yolu ilə partiyanın sədri, Məclisin sərbəst üzvləri, Nəzarət-Təftiş Komissiyası seçilib.
Sədr postunu o zaman həbsdə olan İlqar Məmmədov tutub.
1970-ci il təvəllüdlü İlqar Məmmədov 2013-cü il fevralın 4-də, İsmayıllıda hökumət əleyhinə iğtişaşlar (23-24 yanvar 2013-cü il) təşkil etmək ittihamı ilə tutulub, 2018-ci il avqustun 13-dək həbsdə yatıb.
REAL Partiyanın 3200-dən çox üzvü var. Nizamnaməyə əsasən, partiya strukturu ikipilləlidir: el məclisləri, yəni yerli təşkilatlar; qurultay, Məclis, Nəzarət-Təftiş Komissiyası, İdarə Heyəti, yəni mərkəzi təşkilatlar. El məclisləri müxtəlif rayonları birləşdirir.
